Weihrach - Geschichten_by_v3

Rachnocht  / Rauhnocht

Hob und Guad is grod in da Landwirtschaft recht obhengig vo da Nadur und'm Weda. Oiwei scho hod ma bei de Bauern auf'n Herrgod votraud.

Damid an Hof, de Vicha und Vorrädt nix bassiert, hod ma in de Raachnacht Haus, Schtoi und Schtodl mit gnua Weihrach und Weihwassa gweicht.

Freilich warn de Kinda vom Hof do aa oiwei dabei. Und wenns wos mid'm Feia z'doan g'habt hod glei freiwillig! Owa Owacht mid da Gluad im Schtodl, weil dort an Hauffa recht brennbare Vorrädt, wia Hei und Strou, omananda lengd!

Zom Raacha is erscht da Ofa in da Kuche gscheid eighoazt worn, so daß a gscheide Gluad gem hod. Mid'm Ofahaggl hod ma wos davo aussa g'hoid und in an oidn Blechkiwe, der hoffntlich koane Lecha kabt hod, eine do. A Baggal Weihraach hod ma oiwei dahoam g'habt. Wenn ma den iwa de Gluad gschidt hod, hods aa scho recht feialich grocha. Mid dem schauklndn Kiwe und a Flaschn Weihwassa hamma mia Kinda und unsa Vadda naus ganga und scho a da Fletz dausdn war de ganze Bude eigraacht.

Zerscht hamma zom Roßschtoi ganga, der glei a's Haus hi baud war. Den hamma gscheid eigwaschld mid'm Weihwassa und mid na gscheidn Borzion Weihraach eigraacht. Dazua no a 'Vadda unsa", damid aa nix bassiert.

De näxde Diar war da Sauschtoi - de hammd ganz schee dumm gschaugt, wia'ma do daher kemma hand mid unsam Seng. Auf'm Weg zum Kuaschtoi hamma aa den Schtodl no midgnamma. iwaroin is do gscheid eine graacht und eine gschbridzt worn. A 'Vadda unsa' und a 'Gegrüßed seist Du Maria' hod g'hoiffa, damid a's Johr iwa nix bassiert.

Mid dem lezdn Raach und Weihwassa hamma nachad wieda zruck a's Haus maschiert und de Gluad is wieda im Ofa eine kemma.


Aufgeschrieben am 25. Nov. 2012 von Johann Wiesheu (*1965), München

b23020_WJ_Rauchnacht_by_11Mai14